Abereak protagonista Basherri egunean

Eguneko unerik aipagarrienetako bat 13:00etan iritsi da, bertaratutako ekoizleek haien porduak zozkatu baitituzte frontoian, jendetza zabala bilduz. Irabazleek sorpresa ederra eraman dute etxera, erosketa-bonoz beteriko saski bana irabazita.

Musika ere ez da falta izan jaialdian, Lazkao Txiki Musika Eskolako trikitilariek giroa alaitu baitute euren doinuekin. Egunak herritarren arteko elkartasuna eta komunitatearen indarra sustatzeko balio izan du, bertako ohiturak ospatuz eta gaztetxo zein helduen begiradak ganaduarengana gerturatuz. Txerriak, antzarrak, ahuntzak, zaldiak eta bestelakoek plaza hartu dute, eskaintza zabala gerturatuz.

2012an antolatu zuten lehen aldiz Basherri Eguna Lazkaon San Migel jaiaren baitan. Egun handia izaten da hauxe lazkaotarrentzat eta jai eguna osatzeko, herriko baserritarrei protagonismoa ere eman nahi izan zitzaien. Lazkaotarrei herriak duen landa-ondarea ezagutaraztea zen xedea, «kaletarrentzat» askotan ezezaguna dena hain zuzen. «Lazkaon zer baserri ditugun ezagutarazteaz gain, baserri bakoitzean zer ekoizten den ere ezagutarazi nahi dugu», azaldu zuten orduan udal ordezkariek .Nahiz eta errezeloren bat edo beste izan -batez ere animaliak herrira «jaisteak» ekar zitzakeen zailtasunengatik-, ideia ondo hartu zuten baserritarrek eta proposamena aurrera atera zen.

Orduz geroztik pandemia garaian soilik egin du huts uda amaierako agendan leku finkoa topatu duen jai honek. Dagoeneko ez da San Migel egunean antolatzen -bakoitzak bere protagonismoa du horrela-, baina horrek ez dio erakargarritasunik kendu, igande honetan argi geratu den moduan.