Lazkao

Trantsizio topaketa burutuko du datorren asteazkenean Biziolak ekoizleekin

Biziolak ospakizun berezia burutuko du azaroaren 29an. Azken hiru urteetan landutako prozesuaren emaitzak eta prozesua bera aurkeztu eta bide batez ospatuko dituzte.

Eskualde iraunkorrago bat helburu, Biziola kooperatibaren jomugetako bat ekoizpen moduak eraldatzea da, eredu ekologiko jasangarri eta bidezko baten bidean. Horrela, Biziolak lehen sektorearen bidelagun izaten jarraitu nahi du, trantsiziorako bide-orria proiektu ezberdinen bitartez garatuz.

Eraldaketa hau bideratzeko lehen tresna denda da. Bertan, eraldaketa prozesu hau emateko konpromisoa agertu duten eskualdeko eta gertuko proiektuen produktuak aurkituko ahal dira; eta eskaintza hau, kanpoko produktu ekologikoekin osatzen da. Eta bigarren tresna, bide-orri hori argitzeko ekoizleekin elkarlanean garatu den Adierazle Sistema da.

Datorren asteazkenean, arratsaldeko 19:00etan, prozesu honetan ekoizleek egindako lana aurkeztuko da Biziolan. Ospakizun egunean denok bat egitera animatu dituzte interesdunak, eta bertaratzeko gonbitea luzatu die.