Legorretako armarria berritzeko prozesua martxan jarri du Udalak

Legorretak, historian zehar, armarri bat baino gehiago erabili izan du, eta nahaste handia sortu izan du horrek. Gainera, Udalak azaldu du orain arte erabilitakoak oso zaharkituta geratu direla, eta horergatik, armarri bakar eta berritua sortzeko prozesua abiarazi du.

Eusko Ikaskuntzari ikerketa bat eskatu dio Udalak, armarriaren historia jakin eta hura berritzeko irizpideak jasotzeko helburuz. Rosa Aierbe Historian doktore eta EHUko irakasleak burutu du ikerketa, eta egoera aztertu ostean, Aierbek proposamen hau egin dio Udalari: «Armarri tradizionalari eustea, haritza identifikatuta mantenduz, zuhaitza kromatu eta gaur egungo arau heraldikoetara egokitu. Gainera, gaur egun egokiena litzateke kanpoko apaingarriak kentzea (koroa, zapia eta hitzak). Izan ere, 'Noble y Leal villa' ez baita Legorretaren ezaugarri bat, Gipuzkoako herri guztiei emandako titulu bat baizik». Ondorioz, Aierberen irizpideei segika eta armarrien araudi heraldikoa errespetatuz, Legorretako Udalbatzak, irudian ikus daitekeen proposamena onartu du aho batez.