Legorretako etorkizunaz hitz egingo du udalak gazteekin

Herritarrekin egindako partaidetza saioen baitan, martxoaren bukaerara bitartean herriko gazteekin elkartuko da udala. Helburua Legorretari buruz duten ikuspegia eta etorkizunera begira nolako herria nahi duten ezagutzea da.

Guztira hiru bilera egingo dira udaletxean, adin tarteen araberakoak. Lehenengo bilera martxoaren 21ean izango da, 17:30ean, 17-18 urteko gazteekin. Hilaren 23an, ordu berean, 15 eta 16 urteko gazteekin elkartuko da, eta 28an 12 eta 14 urte bitartekoekin. Bilerak Arremanitz elkarteko hezitzaileek gidatuko dituzte, eta ariketa ezberdinen bitartez joango dira erantzunak jasotzen, jolasekin, eta abar.