Udal aurrekontuen aurka bozkatu du Legorretako EAJk

Urte amaierarekin batera, Udal aurrekontuak osatzeko garaia da. Legorretan joan zen azaroaren 29an egin zen udal aurrekontuak bozkatzeko bilkura. 2023ko aurrekontua onartu egin zen EHBilduren udal gobernuaren aldeko bozkekin eta EAJren aurkako bozkekin.

EAJ udal taldeak adierazi zuen udal gobernuak aurkeztutako proposamenaren aurka bozkatu zuela «gazteak herrian bertan gera daitezen beharrezkoak diren babestutako etxebizitzak egiteko asmorik ikusten ez zutelako». Jeltzaleek inbertsiotarako zegoen diru partidaren erdia babestutako etxebizitzak egin ahal izateko lurra eskuratzera bideratzea proposatu zuten, «gutxi gora-behera 200.000 euro inguru».

Bi taldeak ez ziren akordio batera iritsi eta aurka bozkatzeko erabakia hartu zuten. «EH Bilduk ez zuen aurrerabiderik ematen eta beste behin, gaia atzeratu asmoz, enegarren plangintza bat egiteko beharra planteatu zuten. Gure ustetan, gazteek etxebizitza eskuratzeko duten arazoaren aurrean, udalak jarrera proaktiboa azaldu behar du eta promotore pribatuek lehenesten duten prezio libreko etxebizitzen aurrean, babestutako etxebizitzak egiteko urratsak eman behar ditu», diote EAJ udal taldetik.