Udazkeneko kultur egitarau berezia antolatu da Legorretan

Azarorako kultur egitarau zabala antolatu du Legorretako udalak. Datorren igandean, azaroaren 13an, 'Apaiz kartzela' dokumentalaren emanaldia egongo da Herri Antzokian, 18:00etan. Ondoren, Xabier Amurizarekin eta Ritxi Lizartzarekin solasaldia egongo da.

Hurrengo ostiralean, hilaren 18an, Joseba Tapiak kontzertua eskainiko du, 18:00etan Herri Antzokian, Sattok antolatuta; eta 22an, asteartean, Elekun abesbatzaren eta Musika Eskolako ikasleen kontzertua izango da, 19:00etan Herri Antzokian.

Azaroaren 25ean, ostiralarekin, Pantxika Lamourrek emakumeen aurkako indarkeriaren kontrako egunarekin bat eginez 'clown' ikuskizuna eskainiko du, 19:30ean Herri Antzokian. Hurrengo egunean, larunbatean, gaztaina jatea egingo da Guraso elkarteak antolatuta, 18:30ean, frontoian. Azken ekitaldia azaroaren 30ean, asteazkenarekin, izango da, Maider Galartzak haurrentzako eskainiko duen ipuin kontaketarekin, 18:00etan kultur etxean.

Gainera, zinema emanaldiak ere egingo dira. Haurrentzako filmak eskainiko dira azaroko igandetan –hurrengoak 20an eta 27an–, eta helduentzako azaroaren 16an.