Tolosaldea

Minigarbiguneak jarri dira eskualdeko sei herritan hondakinak sailkatzeko

Hondakinen banaketa errazteko helburuarekin, Tolosaldeko Mankomunitateak 'minigarbiguneak' jarri ditu eskualdeko hainbat herritan. Etxola berri horietan, hondakin arriskutsu eta kutsagarriak botatzeko aukera egongo da, Tolosako edo Andoainen dauden garbiguneetara eraman beharrik gabe.

Guztira sei minigarbigune jarri dira, beste hainbeste herritan: Aduna, Amezketa, Altzo, Berrobi, Ikaztegieta eta Lizartzan. Minigarbiguneetan hamar hondakin mota ezberdin bota daitezke. Bakoitzak bere lekua du eta barruan sailkatuta geratzen dira teknikariak jaso bitartean. Etxola hauetara bota daitezkeen materialak zabor orokorrean bukatzea edota bide publikoetan ez uztea du helburu, eta, aldi berean, hondakinen gaikako bilketa-tasak hobetu nahi dira. Sailkapen honen bidez, materialak hobeto birziklatzea erraztuko da.

Hamar hondakin mota ezberdin jasoko dira hemendik aurrera Minigarbiguneetan: informatika- eta telekomunikazio-aparatuak; aparatu elektriko eta elektroniko txikiak; bonbillak; brotxak eta rodilloak; tinta- eta toner-kartutxoak; kazolak, zartaginak eta mahai-tresnak; fluoreszenteak; pilak; pinturak, barnizak eta disolbatzaileak; eta erradiografiak.

Herritako gune ezberdinetan kokatu dira etxolak: Adunan Amalkor kalean, Altzon herriko aparkalekuan dago, Amezketan Zubeldianeko eremuan, Berrobin ikastetxearen ondoan, Ikaztegietan udaletxearen ondoan eta Lizartzan plazako edukiontzien ondoan. Gainera, herritarrek azalpen liburuxka bat ere jaso dute bertan bota daitezkeen produk-tuen azalpenarekin.

Dena den, Mankomunitateak gogorarazten du Tolosako San Blas auzoan eta Andoainen dauden garbiguneek martxan jarrai-tzen dutela. Bertara eraman daitezke bai minigarbiguneetan jasoko diren hondakinak, baita, herrietan jasotzen ez diren bestelakoak, adibidez, obra hondakinak, bidoiak, altzariak, metalak eta txatarra, inausketa eta lorazaintzako hondakinak, egurrezko paletak edota etxetresna elektriko handiak.