Ordizia

Laburbira, euskarazko film laburren zirkuitua, Ordizian ikusgai ostegunean

Euskarazko Film Laburren Zirkuitua, Laburbira, Ordiziara iritsiko da aurten ere. ostegunean, apirilaren 3an, Hirugarren edizioan parte hartzen duten film laburrak ikusteko aukera egongo da Herri Antzokian, 19:00etatik aurrera, eta sarrerak doan izango dira.

Euskal Herri osoan ekoitzitako film laburren bilduma da Laburbira, estilo eta eduki ezberdinetako film laburrez osatua dago. Aurten 51 herritatik igaroko da jaialdia. Emanaldian zortzi filme ikusi ahal izango dira orotara: Ekain Martinezen 'Prosopagnosia', Sonia Estévezen 'Plazer bat', Eneko Sagardoyren 'Betiko gaua', Ekain Irigoienen 'Europa', Karmele Mitxelenaren 'Pentsatzen dut', Jone Arriolaren 'Hor konpon', Nerea Ayalaren, Patricia Fañanásen, David Modroñoren eta Iraia Yartoren 'Goodbay Kepler', eta Alba Lozanoren 'Utlandsk'.

Euskal zinemagintzaren erreferente bihurtu da Laburbira zirkuitua azken bi hamarkadatan. Irudienea Euskaltzaleen Topaguneak antolatzen du jaialdia, euskarazko ikus-entzunezkoen sorkuntza eta hedapena bultzatzeko helburuarekin.

Oraingo honetan, ikusi ahal izango diren film labur guztietatik bi animazio bidezkoa izango dira, zehazki 'Plazer bat' eta 'Goodbye Keepler'. Gainera, Goya sarietarako hautatuak ere ikusiko dira, Ekain Irigorienek zuzendutako 'Europa' eta Eneko Sagardoyren 'Betiko Gaua'.