'Euslandia, unibertso txiki bat' ikuskizun berezia bihar Gerriko Txokoan

Beste behin kultura oinarri duen plan polita bat eskaintzera datorkigu Goierriko Euskal Eskola. 'Euslandia, unibertso txiki bat' ikuskizun berezia ekarri digute oraingoan Gerriko Txokora, Concetta Probanza eta Miriam Lukiren eskutik.

Hitzetan eta marrazkietan oinarritutarik, antzerkia, musika, pintura, filosofia eta poesia uztartzen ditu emanaldi berezi honek. Honenbestez, euskal kultura ardatz hartuta, hainbat gai harilkatuko dituzte: maitasuna, boterea, politika, esperantza...

Ikuskizun honen gidoia galderetan oinarrituta dago. Zenbait ikus-entzulek txistera batetik galdera bana aterako dute eta Miriam Lukik galderak erantzungo ditu, poemak errezitatuz eta ipuinak kontatuz. Concetta Probanzak, berriz, marrazkiak egingo ditu eta marrazki horiek proiektore bidez pantailan ikusiko ditugu. Galdera bakoitzari abesti bat dagokio.

Horixe da ikuskizunaren eskema. «Ondo pasa nahi baduzu, inguratu bihar astelehenean, 18:30ean, Gerriko Txokora», hortxe Goierriko Euskal Eskola kultur elkartekoen gonbidapena.