Ainhoa Larrañagak isilaraziei ahotsa ematen die bere album berrian

Lau urte igaro dira Ainhoa Larrañaga aktore eta abeslariak musika munduan debuta egin zuenetik eta orain bueltan da 'Medusa' bere bigarren diskoarekin. Lan honetan, Medusaren mitoa berreskuratu eta ikuspegi feministatik berrikusten du, R&B-tik Popera doazen soinuekin. Hamaika abestik osatzen dute lana, eta dagoneko plataforma guztietan dago eskuragarri.

Artistaren proiektu diskografiko berria Gorgonak greziar mitologian jasan zuen abusu eta tratu txarren historiatik abiatzen da. Narratiba honen bitartez, Larrañagak paralelismo bat egiten du bidegabekeriei aurre egin dieten pertsonen egungo esperientziekin, isilaraziak izan direnei ahotsa emateko beharra nabarmenduz.

Musikalki, 'Medusa'-k R&B, Neo-Soul, Afrobeat, Synthwave eta Pop generoak fusionatzen ditu, eragin urbano argiarekin eta harmonian eta estetikan jazzaren xehetasunekin. Gainera, abestietan Robert Glasper, Sabrina Claudio, Jorja Smith, Summer Walker, Victoria Monet, Sade, Anita Baker, Jacob Collier, D´Angelo, J Dilla, Erykah Badu eta The Soulquarians kolektiboa bezalako artisten

eragina ikus daiteke. Erreferentzien konbinazio horrek soinu-aberastasuna ematen dio proiektuari, garaikidea dena soul eta jazz musikaren sakontasunarekin nahastuz.

Albuma Chickjuarez musikari, konpositore eta ekoizleak ekoitzi du, eta, gainera, kantuak grabatu, nahastu eta masterizatu ditu. Alberto Maldonado izan du perkusioan, Aitor Bravo baterian, José Vera eta Eric Elías baxuan eta Alfonso Junguitu gitarran.

Letrei dagokienez, gehienak artistak berak idatzi ditu, nahiz eta batzuetan Antton Aranburu musikari eta aktorearen eta Chickjuarezen beraren laguntza izan duen.

Halaber, Larrañagak film labur bat ekoitzi du albumaren atariko gisa.

• Temas
• Euskal musika