Deustuko Unibertsitateak «bere historiaren zati bat berreskuratu du»

Deustuko Unibertsitateak «bere historiaren zati bat berreskuratu du» Bizkaiko Kultura Elkartearen funtsaren dohaintza eta haren zaintzaile zen Antonio Elias Suarezen artxibo pertsonala jaso ondoren. Zuzenbide Fakultateko ikaslea izandakoak elkartearen lehendakaritza hartu zuen.

Bizkaiko Kultura Elkartea 1931n sortu zen, Manuel Azaña Espainiako Errepublikako presidenteak Jesusen Lagundia desegiteko dekretuari jarraiki, orduko Deustuko Goi Mailako Ikasketen Zentroan jesuiten lan akademikoarekin jarraitzeko. Lan hori 1941era arte egin zuen. Bada, Deustuko Unibertsitatetik jakinarazi dutenez, jasotako ondareak hamar urte horietan egindako jarduera akademikoaren dokumentuak biltzen ditu. Jasotako materialen artean daude irakasleen eta ikasleen zerrendak, kalifikazioak, ikasgaien programak, ikasgaien zerrendak, omenaldiak edo Valladolideko Unibertsitatearekiko korrespondentzia, besteak beste.

Elkarteak jesuiten lanaren jarraipena egin zuen eta lan horren bermatzailea izan zen 1940-1941 ikasturtera arte, Deustuko Unibertsitatearen barruan ikasturte berria hasi zen arte, hain zuzen. 1931 eta 1941 artean, presidentea erakundeak sortutako dokumentazio guztia bere etxean mantentzeaz arduratu zen eta, horrela, «Deustuko Unibertsitatearen historia babesteko dokumentu garrantzitsuen gordailuzain bihurtu zen».

«Unibertsitatearen historiaren zati bat babesteko eta ezagutarazteko betebeharra sentitu duen erakunde horren eta haren oinordekoen oroimena bizirik mantentzeko interesari eta kezkari esker, Deustuko Unibertsitateko iraganeko garai bat osa daiteke orain, ia lekukotasunik ez zuena», nabarmendu dute.

Garai hartako historiaren osagarri eta testuinguru gisa, gainera, Deustuko Unibertsitateko Artxiboak Antonio Elias Suarezen artxibo pertsonala ere jaso du. Bilboko, Euskal Herriko eta Espainiako bizitza politiko eta sozialean lekuko eta partaide zuzen eta nekaezina izan zen 1920ko eta 1950eko hamarkaden artean Elias Suarez. «Bere dokumentazioak XX. mendeko historia hurbilenaren zati interesgarri bat islatzen duen informazioa ematen du», adierazi dute Deustuko Unibertsitatetik.

• Temas
• Universidad de Deusto