Katapulta Tour programaren deialdi berri abian da

Katapulta Tour Gipuzkoa programak deialdi berria egin du lurraldean 2025ean egingo den musika eta formatu txikiko arte eszenikoetako proiektuei laguntzeko ekimenean parte hartuko duten artistak hautatzeko. Ohikoa denez, musikako eta arte eszenikoetako hamar proiektu hautatuko dira, eta izena emateko epea zabalik dago abenduaren 2ra arte. Kutxa Fundazioak eta Gipuzkoako Foru Aldundiko Kultura Sailak sustatzen dute Katapulta Tour Gipuzkoa programa, Buenawista Prolleckziom's elkartearen lankidetzarekin.

Bada, hamargarren aldia beteko du ekimenaren sustatzaileek jakinarazi dutenez, hautatutako artistei Gipuzkoako hainbat espaziotan lau emanaldi egiteko aukera eskainiko zaie, horietako bat Kutxa Fundazioa Kluba. Horrekin batera, ordainsari ekonomikoa izango dute emanaldi bakoitzeko (500 eurokoa) eta aukera izango dute sustapen-bideo bat grabatzeko, komunikazioari eta sustapenari, eszenografiari, ekoizpenari, ekonomiari eta fiskalitateari buruzko prestakuntza programa bat egiteko eta Kutxa Fundazioak Tabakaleran dituen instalazioetan entsegu-espazio partekatuak doan erabiltzeko. Gainera, deialdian inskribatutako proiektu guztiei, nahiz eta hautatuak ez izan, aipatutako prestakuntza-programan doan parte hartzeko aukera emango zaie.

Orain arte egindako bederatzi deialdietan, guztira, 713 artistaren 1.027 inskripzio jaso dira. 2025aren amaieran, programaren hamar edizioetan 96 musika-proiekturi eta arte eszenikoetako 28 proiekturi lagundu zaie; guztira 124 proiekturi.

Goizane Álvarez Kulturako diputatuak gogoratu duenez, «urte hauetan, Izaro, Elena Setién, Sara Zozaya edo Idoia Asurmendi nabarmendu dira, proiektuaren eragina erakutsiz». Bestalde, Ane Abalde Kutxa Fundazioko arduradunaren esanetan «Katapulta Tour Gipuzkoa Programan prestakuntzaren aldeko apustua egiten jarraitzen dugu edizio berri honetan, formatu trinko eta pertsonalizatuarekin, kasu praktikoak aztertzeko».