Lehen sektorea ere «kontuan hartzekoa»

Fraisoro nekazal eskolako arreo nagusian, Gipuzkoako Ahaldun Nagusirako hautagaien mahaingurua burutu da aste honetan, Xabier Euzkitzek zuzendutakoa.

Mahainguruan EAJko Eider Mendoza, EHBILDUko Maddalen Iriarte, PSEko Jose Ignacio Asensio eta Elkarrekin PODEMOSeko Miren Echeveste izan dira (PPko Mikel Lezamak ez zuen partehartu azken uneko ez hustegatik).

Hautagai guztiei gonbitea luzatu zien Fraisoron egindako mahai inguru honetan parte hartzeko ENBA sindikatuak, izan ere, «lehen sektoreari eta landaguneko hainbat gai jorratzea nahi zuten».

Abeltzaintza estentsiboa, herri mendietako kudeaketa, Enirio-Aralar Mankomunitateko problematika, basogintza, herri txikitako biziraupena eta lurralde oreka, basafauna eta otsoa, elikagaien merkaturatzea eta energía berriztagarriek nekazal lurrengan duten afekzioa mahai gainean jarri zieten euren iritzia jaso nahian.

«Oreka eta elkarlana izan dira hautagai guztien aldetik hitz erabilienak eta aldi oro, lehen sektoreak larrialdi klimatikoaren aurrean jokatzen eta joka dezakeen papera berretsi da», aitortzen zuten ENBAtik mahai ingurua amaitutakoan eta gehitzen zutenez, «ENBAk oso balorazio positiboa egiten du gaurko mahainguruaz, beren helburua nagusia nekazaritza alderdi politikoen ajendan txertatzea zelako eta oreka hitzaren aurrean, lehen sektorearen errentagarritasuna eta gure herriaren elikadura burujabetzaren aldeko politika zehatzak aldarrikatu ditu».

Bestalde, Enirio Aralarren larretokien irekieran bezperan gaudelarik, ENBA sindikatutik garbi dute «Enirio-Aralar Mankomunitateko herri larretokietako irekiera ospakizuna eta aurtengoan ere, beste behin, abeltzainok ezer gutxi dugu ospatzeko, oso haserre baikaude Mankomunitateko agintarien jokabidearekin».

«Aurtengoan, beren agintaldiaren amaieran, Mankomunitateak daraman jokabidea eta norabidearen balorazioa egiteko une aproposa denez, ENBA nekazal sindikatuak oso balorazio ezkorra kaleratu nahi du. Enirio-Aralar Mankomunitateak mendira igotzen diren abeltzainekin zituen interlokuzio osoa lehertu du eta egun, ez dago inongo komunikaziorik abeltzainen ordezkarien eta Mankomunitateko agintarien artean», diote.

«Interlokuzio faltaren ondorioz, Mankomunitateak bere norabide propioa finkatu eta gauzatu du, abeltzainek aldarrikatutako azpiegiturak eta lanak alboratu (bideak, txabolak, xehaketak, etb) eta, mantenimenduko gutxieneko lanera mugatu da. Ez da kasualitatea hutsa, aurrez erabakitako estrategiaren ondorioa baizik, abeltzainek eskatutako azpiegitura eta lanei muzin eginez, bere norabidea txalotzen duten talde sasiekologisten babesa jasotzen dutenez.

Beraz, argi ikusi dugu, egungo Mankomunitateko gehiengoak, EHBILDUko hautetsiek osatu eta gidatzen dutena, abeltzainak alboratu eta gutxietsi eta talde ekologistek markatutako bideari jarraitu diotela, mendikoei bizkarra eman eta mendira asialdirako igotzen direnei arrazoia emanaz. Egoera penagarri honek ondorio latzak ekarriko ditu mendirako eta abeltzaintzarako eta, bide honetatik jarraituz gero, argi eta ozen esan beharra dago, arduradun bakarrak izango direla, hau da, EHBILDUko herri hautetsiak«.

• Temas
• Euskera
• Zabalik