Lumafest jaialdiaren lehen edizioa hastear da

LUMAfest! gazteentzat eta gazteentzat sortutako literatura sustatzeko helburuarekin sortu den jaialdia da. Gipuzkoako Foru Aldundiak eta Koldo Mitxelena Kulturuneak bultzatuta, otsailaren 9, 10 eta 11n egingo da hainbat jardunaldirekin non hemengo, nazioko eta nazioarteko egileek parte hartuko duten. Luma hitzak duen esanahia kontuan hartuta gazteen irakurketa eta sorkuntza literarioa babestu nahi ditu ekimenak. Honela, gazteek gonbidatutako idazleekin egiten diren topaketetan modu aktiboan parte hartzeko aukera izango dute, eta baita antolatuko diren lehiaketetan parte hartzeko. Lehen edizio pilotu hau formatu hibridoan (analogiko-digitala) egingo da, baina etorkizunera begira, urtero genero desberdinetako idazleak gonbidatuko ditu jaialdiak, horien literatura berrikuntzez hitz egin eta publikoarekin elkarrizketa irekia sor dezaten. Aurtengo eskaintza osatuko duten hiru generoak erromantikoa, fantasia eta zientzia fikzioa izango dira.

Paula Gallego (Donostia, 1995) izango da asteazkenean lehen jardunaldiko protagonista, eta genero erromantikoaz eta 'La tinta que nos une' liburuaz hitz egingo du Amaia García blogariarekin euskaraz egindako elkarrizketa batean.

Bigarren jardunaldia birtuala izango da. Publikoak zuzenean jarraitu ahal izango du Slawka Grabowska blogariak eta literatur solasaldien bultzatzaileak, Romina Garber argentinarrarekin izango duen hitzaldia, literatura fantastikoari eta bere 'Lobizona' eta 'Cazadora' liburuei buruz.

Ostiraleko ekitaldia, itxiera ekitaldia, presentziala izango da Iria G. Parente (Madril, 1993) eta Serena M. Pascual (Vigo, 1989) 'Olympus' sagako lau eskutako egileekin. Topaketa honetan zientzia fikzioaren generoa jorratuko da.

LUMAfest ekimena datozen egunetan izango den arren, badira asteak gazteek modu aktiboan parte hartzeko aukera izan dutela mikrokontakizun lehiaketan parte hartuz. Instagram eta Twitter sare sozialen bidez aurkeztu ahal izan dituzte beren kontakizunak, gehienez 240 karakteretan (tarteekin), euskaraz zein gaztelaniaz 14 eta 21 urte bitarteko edozein gaztek. Karaktere horietan 'pluma' edo 'luma' hitzak izan beharko zuen.

Irabazleak jaialdian zehar ezagutuko dira, izan ere jaialdian parte hartuko duten gonbidatuek aukeratuko dituzte: bi irabazle euskaraz eta bi gaztelaniaz. Denek eskaintza pertsonalizatua duen liburu sorta bana jasoko dute. Gainera, testu onenak jaialdiko sareetan partekatuko dira.