Oteizaren obraren inguruko hamalau ikuspegi

Jorge Oteiza artistaren obra izango du ardatz 'Oteiza 14 apostolu' ikus-entzunezkoak. Oskar Alegriak zuzentzen duen lan honetan, kultur giroko hainbat arlotatik datozen hamalau lagunek parte hartuko dute, eta bakoitzak, laburki, Orioko sortzaile handiaren ibilbidean eta ondarean garrantzitsua izan zen kontzeptu bat argituko du. Honela, guztien artean, bere obrari eta pentsamendu estetikoari lotutako diziplina artistikoen eta interes kulturalen aniztasuna irudikatzen dute.

Errealizazio-fasean dagoen lan honek 30 minutu inguruko iraupena izango du, nahiz eta kapitulu bakoitza pieza bat bezala pentsatuta dagoen. Friso moduan, parte-hartzaile bakoitzak Alegriak proposatutako Oteizaren iruditeriari lotutako kontzeptu bat interpretatzen edo aipatzen du, multzo erritmiko eta artikulatu bat osatuko duen partitura ireki batean..

Proiektu hau Artingeniumek garatzen duen Danok Oteiza programaren barruan kokatzen da, artistaren pentsamendua eta figura gizartean hurbiltzeko eta zabaltzeko helburua duena. Oteiza Fundazioak eta EITBk lankidetza-hitzarmena sinatu berri dute ikus-entzunezko pieza hau ekoizteko.

Dagoeneko grabazio batzuk egin dira: Esther Ferrer artistarena (isiltasuna eta hutsunea); Ignacio Agüero idazle eta zinema zuzendari txiletarrarena (Oteiza eta Huidobro); Alicia Otaegi artistarena (Oteiza eta maskara); Josu Iztueta abenturazalearena (apostoluak eta Arantzazuko mendiak); Amorante musikariarena (apostoluen doinua) eta Alegria berarena (Oteiza eta ipar-mendebaldea).

Alegriak hainbat film zuzendu ditu, nazioarteko lehiaketatan aitortza ugari jaso dituzten lanak: hala nola 'Emak bakia' (2012), 'Zumiriki' (2019) eta 'Zinzindurrunkarratz' (2023). Horrez gainera, 'Oteiza al margen. Notas manuscritas sobre cine y arte' (2017) monografia argitaratu zuen, Jorge Oteiza Museo Fundazioaren eta Punto de Vista Zinemaldiaren eskutik.

Halaber, laster, frisoan parte hartuko dute Bertha Bermudez dantza garaikideko ikertzaileak eta Jaione Apalategi Oteiza Fundazioko lehendakariak. Jorge Oteizak keinuarekin eta euskararekin duen harremanari buruzko 'apostolutza' egingo dute, hurrenez hurren.

Aurtengo ekainaren amaierara arte gainerako grabazioak egingo dituzte Euskal Herriko, Japoniako, Parisko, Txileko eta New Yorkeko hainbat agertokitan. Ikus-entzunezko pieza ekainaren amaieran estreinatuko da ETBn, eitb.eus-en eta PRIMERAN plataforman.

• Temas
• Jorge Oteiza