Zinebik Kimuak programaren 25 urteak ospatuko ditu

Bilboko Udalak antolatutako Zinebi Dokumentalen eta Film Laburren Nazioarteko Jaialdiaren 66. edizioak Kimuak programaren 25. urteurrena ospatuko du, programatik igaro diren 12 film laburren aukeraketa bat proiektatuz. Bi emanaldi programatu dira, biak Azkuna Zentroko Golem Alhondiga zinema aretoetan, azaroaren 9an (21:30ean) eta 10ean (17:00etan).

Kimuak Eusko Jaurlaritzako Kultura Sailak eta Hizkuntza Politika Sailak antolatzen du Etxepare Euskal Institutuaren bitartez eta Euskadiko Filmategiarekin lankidetzan, eta 1998an sortu zen, mundu osoan euskal film laburrak sustatzeko eta banatzeko. Urtero, Kimuak zigilupean, nazioarteko jaialdi garrantzitsuenetako hautaketa batzordeek Euskadin urtero ekoitzitako film labur onenetako batzuen bilduma bat aurkitzeko aukera dute.

Bada, film horiek banatzen hasi zirenetik mende laurdena igaro denean, Zinebik Kimuak programa omenduko du aurtengo edizioan. Horretarako, katalogotik pasa diren 12 film labur proiektatuko ditu, horietako batzuk Zinebin sarituak eta programaren zabalkunde lanari esker munduko zinemaldi garrantzitsuenetako batzuetan proiektatuak izan direnak. Zuzendarien artean, azken urteotako euskal zinemagile nabarmenetako batzuk daude, hala nola Estibaliz Urresola, Aitor Arregi edo Borja Cobeaga.

Era berean, Kimuak programaren esperientzia Espainiako Estatuko bederatzi autonomia erkidegotako ordezkariekin partekatuko da, film laburren banaketa autonomikoko katalogoen hirugarren topaketaren esparruan. Ekimena azaroaren 10ean izango da, Azkuna Zentroan,

Zinebi Dokumentalen eta Film Laburren Nazioarteko Jaialdia azaroaren 8tik 15era ospatuko da. Bere 66. edizioan, 44 herrialdetako 132 lan proiektatuko ditu.

• Temas
• Zinema