Gure Zirkua Idiazabalen izango da urriaren 11tik 26ra

Nekea hitza ez dago Gure Zirkuaren hiztegian. Ez haren sinonimorik. Zazpigarren bira maiatzean abiatu eta ordutik apenas atsedenik gabe batetik bestera daramate zirku ibiltaria, herriz herri magia, zorionak, entretenimendua eta geratzen diren uneak utziz. Orain Idiazabalen txanda da, urriaren 11tik 26ra 11 emanaldi eskainiko baitituzte.

Hobe zita ez galtzea, aurreratu dutenez zazpigarren bira laster amaituko da. Ohi bezala, sarrerak jada salgai dira Gure Zirkuaren webgunean eta, oraingo honetan Beasaingo Vicuña Sport dendan ere.

Haien arte eskuzabal eta herrikoia adin guztietako herritarrekin partekatuko dute, eta une ahaztezinak biziko dira zirkuaren eszenatokian zein harmailetan. Zehazki, saioak ondorengoak izango dira: ostirala 11, 19:00etan; larunbata 12 16:30ean eta 19:00etan; igandea 12, 18:00etan; ostirala 18, 19:00etan; larunbata 19, 16:30ean eta 19:00etan; igandea 20, 18:00etan; ostirala 25, 19:00etan eta larunbata 26, 16:30ean eta 19:00etan.

Maiatzean abiatu zuen Gure Zirkuak herriz herri txiki zein helduen bihotzera heltzen den ikuskizunaren zazpigarren bira. Maiatzean Etxabarri Ibiñan abiatu zuen, nolabait lurraldearekin sentitzen zuen zorra kitatzeko eta «arantza hori ateratzeko asmoz» egina, 2018an errepidetara atera zenetik Araban bi egonaldi zituelako soilik. Eta ordutik, ohi bezala, ez da geratu: ekaineko lehen bi asteak Arrigorriagan egin zituen, hilabetea Azpeitian amaitu zuen, uztaila Lekeition igaro zuen, abuztuan azken urteetan egin bezala Orion zabaldu zuen karpan une oso bereziak biziz eta uda amaieran Bidasoa inguruetan barreiatu zuen margia, lehen aldiz Lesaka zapalduz. Azken egonaldia Hondarribian izan da.