Urpekoa eta trainerua pareko

Aldaketa ugarirekin osatu zuen hasierako hamaikakoa Imanolek (osteguneko hitzorduari zer nolako garrantzia ematen dion agerian utziz). Zale eta aditu asko ezustean harrapatuz zituen; gutxik asmatuko zuten zerrenda osoa. Edo inork ez. Baina hasierako zalantza gutxi batzuren ostean, Realaren nortasuna nagusitu zen izenen gainetik. Defentsa serio aritu zen, oro har, eta talde honi golak sartzeko gogotik lan egitea ezinbestekoa dela argi utzi zuten. Izan ere, makina bat hitz egin da txuri-urdinek golak egiteko duten gaitasunaz, baina azken bost partidetan bakarra jaso izana ez da edonolako marka.

Atzokoa baino partida ikusgarriagoak osatu ditu Mikel Oyarzabalek denboraldi honetan. Ez zen beti fin ibili, baina beste behin erabakigarria izan zen kapitaina. Realak Anoetan egin dituen hamar goletatik seitan parte hartu du eibartarrak, berak zuzenean sartuz edota asistentzia emanez. Penalti jaurtitzaile bezala ezin zaio txintik ere esan, seguru bat da, baita atezaina behar baino gehiago mugitzen bada ere (selekzioen ere bota beharko lituzke?). Harrobiko jokalariz beteriko hamaikakoa zelairatu zuen atzo Imanolek, gaztetxo ugari. Eta bera guztien kapitain, teniente edo jeneral aritu zen beste behin.

Oso garrantzitsutzat jo daiteke atzo etxean lortutako puntua (hari esker lehen postuan jarraitzen du Realak, bakarrik), baina iragana da dagoeneko. Osteguneko partida dugu denok miran, horrenbeste izerdi eta sufrimenduri esker lortu zen Europa Leaguean aurrera jarraitzeko aukera. Rijekari gailentzea ezinbestekoa da eta horretarako, defentsan serio egoteaz gain, aurrean ere fin ibili beharko da. Hiru eta lau gol sartzen zituen talde hari gehixeago kostatzen ari zaio orain. Ongi etorriko li-tzaiguke, zalantzarik gabe, Silva itzultzea. Bera titular izan ez den partidetan ez du irabazi Realak.

Baloia lagun zuela munduko zelaietan bere jokoaren magia zabaltzeari utzi zionetik hamarkadak pasatu badira ere, badirudi Maradonaren heriotza izan dela nolabait futbolaren aro bati amaiera eman diona. Une gogoangarriz beteriko liburua behin betiko itxi duena. Egia da kirola alde batera utzita, azkenaldian bere bizitzako kapitulu gatazkatsu eta lazgarrienak nagusitu direla kontakizunean, baina egunotan futbolzaleen oroimenean ongi finkatuta dauden une eder asko gogorarazi dira, eta horri esker belaunaldi berriek ere ezagutu ahal izan dituzte. Reale Arenara ez zen iritsi bere magia, baina atzo presente izan zen.