Patxi Zubizarreta: «Pantailara gero eta gehiago hurbiltzen ari den hori erakartzea da gure erronka»

Memoria ariketa bat. Hala laburtu du Patxi Zubizarreta idazleak 'Zerria' (Erein) liburua Euskarazko haur eta gazte literatura jasotzeko ekitaldian. «Pozaren pozez» bertaratu da Donostian halako aitortzak «zoragarriak» direlako, nahiz eta hein batean sektorearen egoeraren erakusle ere badiren. «Liburua Lizardi sarira aurkeztu behar izan nuen hilabeteak joan eta hilabeteak etorri autonomo kuota ordaindu behar delako». Lehiaketa hark eman zion bide eta orain «irakurleei esker» jarraituko du aurrera. Bide horretan 'Zerria' liburuak Espainiako Haur eta Gazte Literatura saria eskuratu zuen duela gutxi.

- Nola baloratzen duzu saria?

- Eskoletara joaten naizenean galdetu ohi didate eta beti esaten diet gehiago direla jaso ez ditudan sariak. Txasko horiek ez dira Wikipedian edo sarean agertzen eta, alde horetatik, berriro gogoa jarraitu ahal izateko eta behingoz nahi dudan liburuak erosi eta azpimarratzeko. Finean idazleak hori baikara, irakurleak. Eta poza bigarren bizitza bat emango diolako liburuari eta aukera ematen duelako gaztelaniako itzulpena bideratzeko. Hori da literaturak aldarrikatzen duena, itzulpenaren espiritua.

- Sektorearen egoerari buruz hausnartu duzu prentsaurrekoan. Saria tankea berriro ere gasolinaz betetzeko modua da?

- Oso konplexua da. Alde batetik, errealitatea oso gordina da; eta, bestetik, irakurlegoa urrutiratzen ari da. Gure erronka pantailara gero eta gehiago hurbiltzen ari den hori erakartzea izan behar da. Literatura pantailetan ere bada, asko, eta uste dut horrek egungo mundura egokitzeko aukera eman behar digula. Ildo horretan liburu atipikoa da 'Zerria', haurrentzako albumak oso koloretsuak direlako baina nerabe bihurtzen ari diren neurrian marrazkiak zuri-beltzean dira eta, gero, desagertu. Oso ondo dago komikia, helduok marrazkiak ere behar ditugula, eta berdin gazte literaturako liburu batean marrazkiak koloretan sartzea eta are gehiago Anton Olariagaren kalitatearekin. Diziplinartekotasuna oraindik gehiago landu behar dugu, mundu hiperazeleratu eta bortitz honetan literaturak belarrira xuxurlatzen digun ahots bat ematen ditugulako.

- Moldeak ez dira soilik koloreetara mugatze, luzerarekin ere antzeko gertatzen da.

- Nik ez dut bereizten haur eta gazte literatura artean, gero argitaletxean dator sailkatzea. Idazterakoan egia da publiko bat bereziki dudala gogoan. Liburu honekin Legazpin egindako ariketa asko gustatu zitzaidan, batxilerreko ikasleekin liburua hizkuntzatik, literaturatik, aztertzeaz gain biologiatik -glaziarrak, mendiak, munduaren garapena eta gainbehera- eta filosofiatik landu zutelako, azken finean liburu honek birformulatu egiten duelako begi-bistakoa den 'homo homini lupus' kasu honetan 'homo homini porkus' da. Narraskeria handienak egiten ari gara.